Në Akademinë e Shkencave të Shqipërisë u mbajt mbledhja e parë e Komisionit të Përhershëm të Artit dhe Trashëgimisë Kulturore

Akademia e Shkencave e Shqipërisë e ka zhvilluar sot mbledhjen e parë të Komisionit të Përhershëm të Artit dhe Trashëgimisë Kulturore. Sipas njoftimit të ASHSH-së, ky komision do të merret me problematikat, shqetësimet më të ngutshme në fushën e artit, trashëgimisë kulturore dhe asaj natyrore.

“U zhvillua sot mbledhja e parë e Komisionit të Përhershëm të Artit dhe Trashëgimisë Kulturore, të ngritur sipas Vendimit 44, datë 19.12.2019, pranë Akademisë së Shkencave. Në takim morën pjesë akad. Vasil S. Tole, akad. Fatos Kongoli, akad. Emin Riza, akad. emeritus Mark Tirta, akad. Xhevahir Spahiu, prof. Maks Velo, prof. Agron Fico, prof. Perikli Qirjazi, prof. Stefan Çapaliku, Prof. Najada Hamza dhe prof. as Andi Rëmbeci. Pas konstituimit dhe njohjes me Vendimet, pikat e Statutit për ngritjen, detyrat dhe funksionimin e këtij Komisioni, takimi vazhdoi me diskutimin e problematikave e shqetësime më të ngutshme në fushën e artit, trashëgimisë kulturore dhe asaj natyrore si dhe propozimet për të bërë një kalendar të qartë e të detajuar të punës së këtij Komisioni përgjatë gjithë vitit e për t’ia bërë menjëherë të ditur këto propozime Kryesisë së Akademisë së Shkencave”, bëhet e ditur në njoftimin e sotëm të  Akademisë së Shkencave të Shqipërisë.