Ndarja e parakohshme nga jeta e aktorit të njohur Xhevdet Ferri, është humbje e madhe për artin tonë të mirëfilltë. Ky lajm i kobshëm na ka tronditur të gjithëve: artistët, pedagogët, studentët dhe adhuruesit e panumërt të aktorit Ferri. Në këto momente të vështira, shpreh ngushëllimet më të thella, në radhë të parë familjes së respektuar Ferri, komunitetit të aktorëve – artistëve, drejtuesve të Universitetit të Tiranës dhe mbarë opinionit publik.
Xhevdet Ferri, si aktor, profesor dhe dekan në Fakultetin e Arteve të Universitetit të Tiranës, punoi me përkushtim, profesionalizëm të lartë dhe u shndërrua në model dhe burim frymëzimi për mijëra të rinj e të reja.
Ai la pas vetes një vepër të jashtëzakonshme në lëmin e artit duke realizuar dhjetëra role në filmat më të njohur të kinematografisë shqiptare.
Qoftë i përjetshëm kujtimi i Tij!
Prof. Dr. Vullnet Ameti
Rektor i Universitetit të Tetovës
