1910-ta, përkujtohet si viti kur u kremtua për herë të parë dita e 8 Marsit, sot e njohur si Dita Ndërkombëtare e Gruas. Ishin të paktën 100 gra, përfaqësuese të një sërë vendesh evropiane dhe të Shteteve të Bashkuara të Amerikës, të mbledhura në Kopenhagë të Danimarkës nën kryesinë e Klara Cetkinit, që vendosen që çdo vit 8 Marsi, të përkujtohej si Dita Ndërkombëtare e Grave.
Kjo ditë u zgjodh në kujtim të 8 Marsit 1857, kur rrobalarëset e New York-ut u ngritën në protestë për të drejtat e tyre kundër shtypjes e shfrytëzimit të egër, që u bëhej në punë atyre dhe fëmijëve.
Sot, raporti i femrës bashkëkohore me familjen, me shoqërinë, me organet e pushtetit dhe institucionet tjera qeveritare dhe joqeveritare nuk është thjesht një çështje dëshirash, por është çështje elementare e lirisë dhe e të drejtave individuale dhe kolektive.
Sot, jehona e saj festive ndjehet në mbarë botën, edhe pse me ritme më të ngadalta, ka gjetur terrenin e saj festiv edhe në mesin tonë, respektivisht në shoqërinë shqiptare. Femra shqiptare është e njohur për sakrificën në edukimin dhe kujdesin për familjen, prandaj në emër të këtij përkushtimi, le ta nderojmë sot, në ditën më të veçantë për të, por urojmë që mirënjohja dhe respekti për nënat tona të mos venitet për asnjë çast.
Çdo festë ka historikun dhe karakteristikën e saj, por sigurisht edhe 8 marsi identifikohet me simbolikën e dhurimit të luleve, dhurimi i të cilave shpreh nderimet më të larta për femrën, shtyllën kryesore të shoqërisë sonë..
Prandaj në emër të kësaj simbolike, dhuroni sa më shumë lule, por jo vetëm në 8 mars . . .
