Ermal Duli – Aktoren e shkëlqyeshme, aktivisten shembullore dhe kolegen time Kaltrinë Zeneli e përgëzoj për guximin dhe vullnetin për ta raportuar dhunën duke e publikuar videon që na ka tronditur të gjithëve!
Kaltrinën pata fatin ta njoh kur isha student i vitit të parë, në degën e Regjisë së Filmit, në Fakultetin e Arteve. Në atë kohë, ne si studentë, po i mësonim hapat e parë të filmbërjes dhe na duhej ndihmë nga kolegë e kolege të fushave të ndryshme të artit që të mund t’i realizonim filmat semestral. Kaltrinë Zeneli ka qenë një ndër njerëzit e parë që na ka ofruar ndihmë, duke ardhur për të aktruar nëpër filmat tanë, pa pagesë, vetëm e vetëm që ne të arrinim ta realizonim filmin semestral e të vazhdojmë përpara me studime. Kaltrina ka qenë gjithmonë një njeri i veçantë, pozitive dhe me shumë energji që të gjithë i’a kemi lakminë. Ajo përherë ka qenë një aktore shumë profesioniste me të cilën të gjithë dëshironin të bashkëpunonin në projektet e tyre. Kjo vazhdon edhe sot, e do të vazhdojë gjithmonë!
Përveç virtyteve të shquara profesionale, Kaltrina ka qenë gjithmonë një aktiviste e të drejtave të grave dhe e të drejtave të njeriut. Për kaq kohë sa unë e njoh Kaltrinën, ajo ka qenë edhe një humaniste e madhe. E mbajë në mend, kur në vitin 2018, Kaltrina bashkë me shoqet e shokët e saj, e mori iniciativen që për festat e fundvitit të mbledhë mjete financiare, rroba, ushqime, dhurata etj, që t’i dhurojë te fëmijët nëpër shkolla, spitale, jetimore, familje që kanë nevojë e shumë e shumë të tjerëve, dhe na ftoi të gjithëve që të kontribuojmë me aq sa kemi mundësi. Kaltrina ka qenë dhe mbetet një qytetare, aktiviste, shoqe e kolege shembullore.
Kaltrina, për shkak të guximit, parimeve, shpirtit humanist që ka, sot përballet me akuza e me kërcënime nga më të ndryshmet, mirëpo ne të gjithë duhet dhe do të jemi përkrahë e në mbështetje të parezervë ndaj saj. Sikur të ishim të gjithë si Kaltrina, bota do të ishtë më e mirë për të jetuar!
Burimi: https://www.facebook.com/ermalgduli