Profesori i Shquar (Distinguished Professor) Brian D Joseph me veprën e tij shkencore ka dhënë kontribut të vyer në studimet gjuhësore në përgjithësi, në studimet indoevropianistike, në studimet ballkanistike dhe në mënyrë të veçantë në studimet helenistike dhe albanologjike. Duke zbatuar metodat moderne të kërkimit shkencor, ai e ka ngritur më lart autoritetin e këtyre disiplinave. Me studimet e tij të thella ai ka arritur të ndriçojë anë të padukshme të ndryshimit dhe evolucionit gjuhësor si dhe të teorisë së morfologjisë. Duke gërshetuar hulumtimin akademik me kërkimin në terren, ka zbuluar anë të panjohura të kontaktit ndërgjuhësor në kontekstin e marrëdhënieve të gjithanshme të shqiptarëve me popujt e tjerë të Ballkanit.

Si vazhdues i traditës më të mirë amerikane të studimeve shqiptare, me skrupulozitet shkencor dhe thellësi gjykimi, ai e ka çuar më tej këtë traditë jo vetëm duke prodhuar një ligjëratë akademike inovative, por edhe duke vendosur dhe nxitur lidhje të drejtpërdrejta me bashkësinë akademike mbarëshqiptare.

Joseph Brian është profesor i shquar i gjuhësisë krahasuese, me objekt të drejtpërdrejtë gjuhët sllave, greqishten dhe shqipen.

Ka mbrojtur PhD në Harvard për këtë fushë dhe ka kryer edhe studime postdoktorale.

Interesimi për gjuhën shqipe lindi tek ky studiues në kuadër të krahasimeve të gjuhëve në kontakt historik dhe gjeografik.

Kontributet më të rëndësishme të tij për shqipen janë studimet krahasuese midis saj dhe sanskritishtes, si protogjuhë e gjuhëve të popujve të Europës.

Ka kryer studime krahasuese midis shqipes dhe greqishtes. Ka botuar studime për zhvillimet dialektore të shqipes juglindore dhe kontaktet e saj me dialektet e Greqisë veriore në rrafsh të sotëm dhe historik.

Nga të rrallët gjuhëtarë indoeuropeistë që merret me gjuhën shqipe. akad.gov.al