Para shumë pjesëmarrësve, përfaqësuesve të institucioneve shtetërore, kulturore, shkencore etj., në Kuvendin e Republikës së Maqedonisë së Veriu u dorëzua solemnisht Çmimi “22 Nëntori”. Fitues i sivjemë është prof. dr. Ylber Sela, drejtor i Agjencisë së Zbatimit të Gjuhës.

Ky çmim ndahet si mirënjohje për arritjet në sferën e jetës politike, kulturore dhe shoqërore në Republikën e Maqedonisë së Veriut, për kontributin në avancimin e bashkëjetesës ndërnjerëzore dhe mirëkuptimit të ndërsjellë ndërmjet pjesëtarëve të bashkësive, kulturave dhe besimeve të ndryshme. Prof. dr. Ylber Sela për këtë çmim u nominua nga Shoqata për kulturë dhe art “Tradita” nga Tetova, të cilën e udhëheq mr. Selam Sulejmani.

Prof. dr. Ylber Sela u shqua për angazhimin e tij të pakursyer në ngritjen dhe konsolidimin e Agjencisë së Zbatimit të Gjuhës të RMV-së. Prandaj ky çmim i lartë shtetëror është njëkohësisht edhe mirënjohje për këtë agjenci e cila vazhdon t’i mbështesë dhe t’i ndihmojë institucionet për ta zbatuar gjuhën shqipe.

Shkup, 22.11.2021