Filluar nga 27. 8. 2021 – 31. 8. 2021, Instituti Nacional Galeria e Arteve Pamore në Tetovë do ta realizojë projektin tradicional, eventin më të madh dhe të suksesshëm që organizohet më shumë se një dekadë , Koloninë Artistike 2021.

Ky është edicioni XII dhe i dyti që organizohet në kushte të jashtëzakonshme pandemie, duke anuluar edhe hapjen solemne ku zakonisht marrin pjesë përfaqësues nga Ministria e Kulturës së R. së Maqedonisë së Veriut, përkrahës financiarë dhe bashkëpunëtorë, udhëheqës të institucioneve të ndryshme si dhe shumë profesorë -veteran të artit figurativ në Tetovë , artdashës të cilët e kanë ndjekur rregullisht këtë manifestim tradicional.

Këtë radhë duke ndjekur udhëzimet dhe rregullat për masat e sigurisë ndaj Covid – 19 të parapara nga Ministria e Shëndetësisë së R. së Maqedonisë së Veriut, kolonia do të filloj realizimin nē hapësirat e hotelit “ Scardus “ që gjendet në qendrën turistike për sport dimëror Kodra e Diellit-Tetovë.

Duke marrë parasysh situatën aktuale të krijuar nga virusi Covid 19, pjesëmarrësit në koloni vijnë jo më larg se nga shtetet fqinje si dhe rajoni ynë. Gjithsej do të jenë 15 artistë të cilët do të ndjekin masat e sigurisë për mbrojtje nga virusi Covid 19, duke punuar me maska dhe mbajtur distancën e rekomanduar. Gjatë këtyre ditëve qëndrimi në koloni, artistët do të krijojnë tri vepra me teknika të ndryshme me tema të zgjedhura nga vet ata, që ne besojmë se do të jenë padyshim të frymëzuara nga natyra e bukur e Malit Sharr që e rrethon hotelin “Scardus”.

Instituti Nacional Galeria e Arteve –Tetovë  ju dëshiron fillim të mbarë artistëve – pjesëmarrës në koloni, duke shpresuar se vitin e ardhshëm kjo ngjarje tradicionale do të realizohet në kushte normale, duke pritur vizitorë dhe duke ndjekur nga afër punën e artistëve tanë.