Në komunikatën për media të Këshillit Drejtues të Seminarit, është bërë e ditur se një pjesë e drejtuesve të Seminarit kanë rezultuar pozitivë me COVID-19 dhe një pjesë tjetër është në vetizolim, duke pritur rezultatet e testeve. Për këtë arsye, Këshilli Drejtues, në pajtim me bashkëdrejtorinë e Tiranës, kanë marrë vendim që edicioni i 39-të i Seminarit për Gjuhën, Letërsisë dhe Kulturën Shqiptare të anulohet.

“Situata e rënduar e ditëve të fundit dhe shtimi i infeksioneve në vendin tonë, por edhe në tërë Evropën, e ka bërë pothuaj të pamundur mbajtjen e këtij edicioni në këtë kohë. Ne kemi insistuar në vazhdimësi që përkundër vështirësive të shkaktuara nga pandemia e virusit korona, të bëjmë çmos që Seminari të mos ketë shkëputje as në këtë vit të rëndë dhe të kontribuojë në njëfarë mënyre në mosndaljen e veprimtarisë shkencore edhe në këto kushte të rënda të pandemisë”, është shkruar në komunikatë.

Tutje, është treguar se Këshilli ka bërë përpjekje maksimale që edicioni i sivjetmë të mbahet me çdo kusht, pasi që kishin qenë të bindur se studiuesit e Albanologjisë kanë nevojë që t’i shpalosin të arriturat e tyre shkencore edhe gjatë këtij viti të rëndë.

“Prandaj, kemi finalizuar programin dhe kemi bërë të gjitha përgatitjet logjistike për ta filluar edicionin e sivjetmë në datat e publikuara më parë, por zhvillimet e fundit e kanë bërë të pamundur një gjë të tillë”, është shkruar në komunikatën e cila mbaron me shpresën për të vazhduar në vitet e tjera traditën e gjatë të Seminarit.

Seminari Ndërkombëtar për Gjuhën, Letërsinë dhe Kulturën Shqiptare vlerësohet si organizimi kryesor për shkencat albanologjike në vend dhe në botë. Është bashkorganizim i Fakultetit të Filologjisë dhe Fakultetit Histori-Filologji, përkatësisht nga Universiteti i Prishtinës dhe Universiteti i Tiranës. Çdo vit ai sjell në Prishtinë albanologë, gjuhëtarë, antropologë e kulturologë nga qendra të ndryshme universitare të Evropës.

Për edicionin e sivjetmë, i paraparë të vinte me pjesën shkencore, ishin caktuar edhe temat bosht: “Struktura e shqipes së vjetër” në gjuhësi, “Letërsia shqipe: vetmia dhe veçimi” në letërsi dhe “Roli i medias në periudhën e infodemisë”, në kulturologji. Për tryezë shkencore ishte planifikuar që të shënohej 120-vjetori i vdekjes së Naim Frashërit dhe 80-vjetori i vdekjes së Gjergj Fishtës.

Në kuadër të Seminarit vitin e kaluar për 12 ditë me radhë ishin mbajtur shtatë ligjërata, katër tryeza, tri referime dhe tetë sesione doktorantësh, gjatë të cilave ishin shpalosur një numër i madh kumtesash. Si takim i përvitshëm shkencor dedikuar shkencave albanologjike, Seminari Ndërkombëtar për Gjuhën, Letërsinë dhe Kulturën Shqiptare nga viti 1974 është shndërruar në ngjarjen kryesore për studiues nga vendi e bota. Falë ndihmës së institucioneve akademike në Tiranë, ky seminar, pas një ndërprerjeje disavjeçare në kohën e represionit serb, nga viti 1995 ka rifilluar sesionet shkencore. Tani ai vlerësohet si organizimi kryesor për shkencat albanologjike në vend dhe në botë, që ka një traditë prej 46 vjetësh. Koha.net