Sekretari shtetëror i Ministrisë së Kulturës së Republikës së Maqedonisë së Veriut, z.Valmir Aziri, sot e hapi ekspozitën me titull “1441” të piktorit të njohur Biljgaip Koçishta – Bige.
Sekretari Aziri përgëzoi autorin për punën e shkëlqyer dhe potencoi se fisnikëria e shpirtit të autorit vërehet në veprat e tij.
Gjithashtu, ai theksoi se Ministria e Kulturës do të vazhdojë të mbështesë punën e artistëve e cila është me rëndësi të veçantë sepse përmes artit dhe promovimit të saj në vend e më gjerë i japim mundësi të madhe njohjes së kulturës dhe vlerave që Republika e Maqedonisë së Veriut posedon.
Ekspozita mbahet në hapësirat e Çifte Hamamit, ku janë të ekspozuara 44 punime të autorit të bëra me teknik vaji, mes të cilave 38 janë portrete dhe të tjerat natyrë e vdekur.
Përmes kësaj ekspozite, autori ka dashur të ndajë emocionet e tij sa i përket migrimit dhe kryesisht portretet janë persona të afërt të tij me të cilët ai ka kaluar shumicën e kohës që nga fëmijëria e deri tani.
Autori Biljgaip Koçishta-Bige, deri tani ka realizuar 20 ekspozita vetjake në vend dhe më gjerë, gjithashtu, ka qenë pjesëmarrës në shumë ekspozita të përbashkëta brenda dhe jashtë vendit.
