Heroi legjendar i luftës çlirimtare të Kosovës dhe komandanti i UÇK-së pritet që së shpejti të jetë i përjetësuar në një skulpturë të veçantë.

Autor i saj është skulptori i njohur Destan Gashi. Lajmin e bën të ditur Pjetër Logoreci, një studiues nga Shkodra që banon në Vjenë të Austrisë. Logoreci e e ka dhënë këtë informacion duke e shoqëruar edhe me një fotografi të skulpturës të Adem Jasharit që është duke u punuar dhe që ndodhet në studion e skulptorit Gashi.

Aty paraqitet vetëm koka e Adem Jasharit me qeleshen por me gojën hapur. Kjo vepër të jep përshtypjen se heroi lëshon një klithmë, duke kujtuar momentin e ditës së 7 marsit 1998 kur ushtria serbe rrethoi shtëpinë e tij në Prekaz të Drenicës dhe pas një beteje disa orëshe vrau vetë Adem Jasharin dhe 58 anëtarë të familjes së tij. Logoreci shkruan:

“Realizimi i figurës të legjendës Adem Jashari, asht një projekt i ri i skulptorit Destan Gashi. Dje pata kënaqësinë me asistue në fillimin e punës, në atelienë e tij”.

Logoreci nuk jep të dhënë se ku do vendoset kjo vepër. Ndërkohë për heroizmin e veprës dhe patriotizmit të Adem Jashari janë frymëzuar shumë artistë shqiptarë të Shqipërisë dhe Kosovës. Një vepër e tillë ndodhet edhe në një nga rrugët kryesore të Tiranës.