Galeria e Arteve Tetovë për herë të dytë organizon ekspozitë kolektive me fotografi artistike ku pjesëmarrës do të jeni te gjithë Ju të cilët e keni pasion fotografinë.

Fotografia është art observimi, ka shumë pak të bëjë me gjërat që ti i sheh dhe gjithçka me mënyrën se si ti e sheh atë. Të kapësh një pamje, të ngrish momentin, zbulon sa i çmuar është realiteti dhe po të pyesësh një fotograf cila është pajisja që ai përdor për të bërë fotografi të mirë, do të ju përgjigjet : “Sytë e mi “.

Çdokush mund të bëjë fotografi, mirëpo ai person që ka pasion e sheh fotografinë para se të shkrep fotoaparatin dhe kjo e bën atë të veçantë!

Ideja për të realizuar një ekspozitë të këtillë ku do të marrin pjesë të gjithë qytetarët të cilët kanë bërë fotografi artistike dhe të cilët kanë menduar që ndonjëherë fotografitë e tyre do të kenë fatin të ekspozohen para publikut, do të jetë shtytje që të gjithë të kyçen në jetën kulturore të qytetit tonë pa marrë parasysh profesionit të tyre.

Me pjesëmarrjen Tuaj do të kontribuoni për zhvillimin e jetës kulturore, për ngritjen e interesimit për artin vizual-pamor si dhe do të hapni dyert për artistët amatorë të ardhshëm të cilët hezitojnë të bëhen pjesë e aktiviteteve tona kulturo-artistike.