Sipas saj, si grupe me prioritet për t’u vaksinuar do të jenë punëtorët shëndetësorë dhe personat që janë më të rrezikuar, siç janë ata që vuajnë nga sëmundjet kronike, shkruan The Guardian, transmeton Gazeta Express.

Zonja Swaminathan tha se pavarësisht testimit të vaksinave në njerëz, vaksinimi i shpejtë dhe masiv ka pak gjasa të ndodhë dhe se ende është duke u punuar në përcaktimin e grupeve që do të kenë qasje të parat në vaksinë.

“Shumica e njerëzve pajtohen që (vaksinimi) të fillojë nga punëtorët shëndetësorë dhe ata që janë në vijën e frontit, por edhe aty, duhet të përcaktoni cilët nga ta janë më së shumti në rrezik, e pastaj të moshuar e kështu me radhë”, tha kjo zyrtare.

“Do të dalin shumë udhëzime, por mendoj se një person mesatar, një i ri i shëndoshë mund të jetë i detyruar të presë deri në vitin 2022 për të marrë një vaksinë”, shtoi ajo.

Swaminathan tha se shpreson që së paku një vaksinë efektive të jetë e gatshme vitin e ardhshëm, por shtoi se ky ilaç do të ishte i qasshëm vetëm në sasi të kufizuar.