Dhjetëra prindër, shumë së bashku me fëmijët e vegjël, protestuan para bashkisë së qytetit të Berlinit duke i bërë thirrje qeverisë lokale të bëjë më shumë për të ndihmuar familjet. Pankartat në duar ishin të shumta dhe ndër to shkruhej: “Hapni shkollat ose nënat do ta humbasin qetësinë e tyre”.
Shkollat gjermane filluan rihapjen e ngadaltë në fund të prillit, por shumë nxënës janë përsëri vetëm për disa orë në javë në shkollë pasi klasat ndahen për të respektuar rregullat e distancës sociale. Sigurimi i kujdesit ditor për fëmijët më të vegjël është edhe më i kufizuar.
Një studim i publikuar nga grupi i sigurimeve shëndetësore DAK javën e kaluar tregoi se 81% e prindërve dhe 62% e fëmijëve mbështesin rihapjen graduale të shkollave, me rreth gjysmën e prindërve që tregojnë se ndihen të lodhur nga ditët e shumta të shkollimit në shtëpi.
Instituti për Kërkime të Punësimit vlerësoi se deri në fund të prillit rreth 56 milionë ditë punë u humbën në Gjermani për shkak të mbylljes së çerdheve dhe shkollave. Gratë, madje edhe ato me profesione shumë të mira, po humbasin durimin për shkak të angazhimit përtej normales me shkollimin në shtëpi.
Kjo dëmton përpjekjet për të promovuar diversitetin dhe ngushtuar hendekun gjinor të pagave të Gjermanisë, tashmë një nga më të mëdhatë në Evropë, në një vend ku shumë gra punojnë me kohë të pjesshme.
Po ashtu, kënaqësia në punë e nënave ka rënë me 5% më shumë se ajo e baballarëve gjatë krizës dhe ka më shumë të ngjarë që ata të kenë ndërprerë orët ose të ndalur së punuari, sipas një studimi nga Qendra e Shkencave Sociale në Berlin.
