Autoritetet shtetërore të Kosovës i kanë bërë të gjitha përgatitjet e nevojshme për shënimin e 12 – vjetorit të Pavarësisë së Kosovës. Më 17 shkurt të vitit 2008, Kuvendi i Republikës së Kosovës e shpalli Pavarësinë e shumëpritur nga gjenerata të tëra që u sakrifikuan në altarin e lirisë, për një Kosovë të lirë dhe të pavarur. Kjo datë ka edhe një koincidencë historike, po të njëjtën datë, 25 vjet më parë filluan ligjëratat e para të Universitetit të Tetovës.

Fillimi i  ligjëratave u shoqërua me dhunën e egër të policisë të ushtruar mbi banorët dhe qytetarët që kishin dalë në mbrojtje të arsimit shqip në vendin tonë.

Si pasojë e dhunës policore, fatkeqësisht pati shumë të lënduar e të burgosur dhe po këtë ditë Abdylselam Emini ra dëshmor i arsimit shqip.

Universiteti i Tetovës, më 17 shkurt 2020 (e hënë), do ta shënojë 25 – vjetorin e fillimit të ligjëratave të para. Drejtuesit e këtij institucioni të arsimit të lartë në gjuhën shqipe në RMV, në këtë përvjetor pritet të organizojnë disa aktivitete, në përkujtim të kësaj date që shënon edhe fillimin e procesit mësimor – shkencor në vitin akademik 1994 /1995.

Pra, në çdo 17 shkurt, shqiptarët gjithandej e shënojnë përvjetorin e Pavarësisë së Kosovës dhe fillimin e ligjëratave të para në Universitetin e Tetovës.