Mbrëmë, në një atmosferë solemne dhe plot emocion, u shënua 81-vjetori i themelimit të Bibliotekës Kombëtare të Kosovës – një ngjarje që nderoi kulturën, dijen dhe rrugëtimin e transformimit digjital të bibliotekave tona.
Të pranishmit i përshëndetën Ministri i Kulturës, Rinisë dhe Sportit, z. Hajrulla Çeku, drejtoresha e përgjithshme e BKK-së, znj. Blerina Rogova Gaxha, si dhe anëtarja e Këshillit drejtues, znj. Blerta Ismajli.
Gjatë ceremonisë u prezantua videoja dedikuar Rrjetit Bibliotekar të Kosovës, duke reflektuar bashkëpunimin, vizionin dhe procesin e migrimit të të dhënave në platformën e re Koha. U theksua përparimi i shpejtë në digjitalizim – një hap madhor drejt modernizimit të shërbimeve bibliotekare.
Çmimi “Pjetër Bogdani” iu nda Dr. Sharon Yang për kontributin e saj të jashtëzakonshëm në hartimin e rrjetit bibliotekar nga anëtarja e këshillit drejtues të Bibliotekës Kombëtare të Kosovës, znj. Ervina Halili.
Ndërsa, u shpërblyen me mirënjohje edhe punëtori i dalluar dhe lexuesi më aktiv i vitit.
Mbrëmja u pasurua nga një performancë elegante e Baletit të Kosovës, dhe u përmbyll me hapjen e ekspozitës “Nga dorëshkrimi te digjitalja”, ku vizitorët patën rastin të shohin libra të rrallë e të vjetër, përkrah versioneve të tyre të digjitalizuara të cilat mund t’i shfletonin për të parë më shumë.
Një ngjarje që na rikujtoi edhe një herë se bibliotekat mbeten ura lidhëse mes trashëgimisë sonë kulturore dhe inovacionit bashkëkohor.
