Fakulteti i Arteve i Universitetit të Tetovës vijon të shënojë suksese në gara artistike ndërkombëtare. Ditë më parë, studentët e këtij fakulteti, njëherazi anëtarë të Korit të Universitetit të Tetovës kanë marrë pjesë në garat ndërkombëtare “International Youth Music Competitions”, që janë mbajtur në Atlanta të Shteteve të Bashkuara të Amerikës.

Në evenimentin e lartpërmendur, Kori i Universitetit të Tetovës i udhëhequr nga dirigjenti Mr. Sc. Premtim Etemi u shpërblye me vendin e dytë. Me këtë rast, ata interpretuan veprën “Një Lule” të kompozitorit Rexho Mulliqi, në kategorinë 19 – 25 vjeç. Në këtë garë kanë marrë pjesë mbi 300 garues nga vende të ndryshme të botës, ndërsa në zhanrin e muzikës klasike studentët tanë janë shpërblyer me vendin e dytë.

Pas këtij suksesi, në të ardhmen pritet që fituesit e çmimeve të marrin pjesë në një koncert që do të organizohet në Nju Jork, me veprat që janë interpretuar në “International Youth Music Competitions”.

Studentët në këtë ngjarje kulturore – artistike me karakter garues kanë pasur mbështetje të plotë profesionale nga Doc. Mr. Teuta Halimi-Selmani dhe Ord. Mr. Bajramali Idrizi, mësimdhënës në Fakultetin e Arteve të Universitetit të Tetovës.