Në Akademinë e Shkencave të Shqipërisë u zhvillua mbledhja e redaksisë qendrore dhe vendore Tiranë për “Enciklopedinë shqiptare”.

Mbledhja u zhvillua për t’u njohur me konkluzionet e takimit dyditor të redaksive vendore Shqipëri-Kosovë, mbajtur në Vërmicë më 25-26 mars 2025, për ecurinë e mëtejshme deri në shqyrtimin e miratimin e fjalësit të projektit “Enciklopedia shqiptare” prej redaksisë qendrore pas miratimit të tij prej dy redaksive vendore.

Organizimi i punës do të synojë që fjalësi të miratohet deri më 15 maj për të kaluar në fazën e kategorizimit të artikujve dhe përcaktimin e autorëve hartues të tyre.

Akad. Gjinushi tha se në Vërmicë u përcaktuan e formuluan disa detyra e rekomandime për redaksitë e fushave në përgatitje të fjalësit të unifikuar për t’ia përcjellë redaksisë qendrore, të cilat do të përmblidhen në një udhëzues.

Në takim u bë dhe një ndarje detyrash për çdo anëtar për këtë fazë. Drejtori i Qendrës së Botimeve Enciklopedike dhe Albanologjike, dr. Arian Leka shprehu dakordësinë me udhëzimet e dhëna nga redaksia qendrore, veçanërisht në drejtim të garantimit e verifikimit të plotësimit të kritereve për çdo artikull, detyruar kjo dhe nga fakti se 70 për qind e “Enciklopedisë shqiptare” është lëndë e re. ATSH