Në edicionin e 50-të me radhë të Seminarit Ndërkombëtar për Gjuhën, Letërsinë dhe Kulturën Shqiptare që u organizua nga Universiteti i Prishtinës “Hasan Prishtina”, pjesëmarrës ishte dekani i Fakultetit Filologjik të Universitetit të Tetovës, Prof. Dr. Berton Sulejmani.

Ai, studimin e tij “Kongresi i Manastirit në këndvështrimin e Petro Janurës (me rastin e 55-vjetorit të botimit të librit të tij me titull: “Nga historia e alfabetit të gjuhës shqipe’’, të botuar në Shkup më 1969)” e ka prezantuar në sesionin e gjuhësisë.

Sipas Prof. Dr. Berton Sulejmanit rruga historike e alfabetit të gjuhës shqipe ka qenë e gjatë dhe shumë e rëndë. “Fillon në shekullin XVI dhe mbaron në fillim të shekullit XX, kur në Manastir, Kongresi i Alfabetit, pranoi vendimin e alfabetit të sotëm të shqipes. Gjithë kjo histori dhe fat i vështirë i zhvillimit të alfabetit të gjuhës shqipe, krahas shumë studimeve të studiuesve tanë dhe të huaj, edhe Petro Janura, nga prizmi i këtij fati të vështirë e zhvilloi këtë temë”- theksoi dekani i Fakultetit Filologjik.

Ndër të tjera Prof. Dr. Berton Sulejmani u shpreh se Petro Janura është themelues i Katedrës së Albanologjisë së Shkupit, e cila është pjesë e Fakultetit Filologjik “Bllazhe Koneski” të Universitetit “Shën Cirili dhe Metodi”. Me rastin e 60-vjetorit të Kongresit të Manastirit, Prof. Petro Janura botoi librin “Nga historia e alfabetit të gjuhës shqipe” (1969) në Shkup me ndihmën e “Entit për botime – NIP” të “Nova Maqedonisë”. Në këtë kumtesë, me me rastin e 55-vjetorit të botimit të librit të tij, do të trajtojmë këndvrojtimin e Prof. Janurës për këtë ngjarje nga më të rëndësishmet të kombit tonë (kombit shqiptar).