“Shihemi në gusht” romani i fundit i autorit kolumbian Gabriel Garsia Markez është një nga librat më të parapëlqyer të kësaj vere për lexuesit. Vepra letrare e nobelistit është një meditim i thellë mbi lirinë, pendesën dhe misteret e dashurisë. Botimi i tij në Shqipëri trokiti si një ngjarje e rëndësishme për letrat. Ndonëse është shoqëruar me polemika, debate dhe një zhurmnajë të gjerë mediatike, ngase porosia e fundme e Markezit ka qenë shkatërrimi i tij, libri është sjell në të njëjtën kohë me botën edhe në gjuhën shqipe, përmes përkthimit të Mira Meksit.
‘Ngjarja kryesore në romanin ‘Shihemi në gusht’, flet për një takim në dukje të thjeshtë, i cili zbulon dalëngadalë shtresa të thellësisë emocionale dhe të njohurive filozofike. Aftësia e Garsia Markuez-it për ta bërë të zakonshmen të jashtëzakonshme, shkëlqen teksa ai zhytet në jetët e personazheve të tij, duke zbuluar peizazhe të gjera të botëve të tyre të brendshme’, ka shkruar artisti Manuel Marino.
‘E vetmuar, me një pamje nga ujërat e amullia blu të lagunës, Ana Magdalena Bach kundron burrat te bari i hotelit. Prej 27 vjetësh ajo është në një martesë të lumtur dhe nuk ka arsye të arratiset nga bota që ka ndërtuar me bashkëshortin dhe fëmijët e saj. Megjithatë, çdo 16 gusht, merr tragetin për tek ishulli ku është varrosur e ëma dhe kërkon një të dashur për një natë. Përgjatë mbrëmjeve përvëluese të Karaibeve dhe rrebesheve tropikale, në mes të donzhuanëve dhe mashtruesve, Ana udhëton çdo vit, gjithnjë e më në brendësi të dëshirës dhe frikës së fshehur në zemrën e saj’.
Në këto faqe, Gabriel García Márquez vërteton sërish se pse konsiderohet një nga shkrimtarët më të mëdhenj të kohës sonë. Ky roman është një shtesë e ndritshme për veprën e tij, një fener për ata që besojnë në fuqinë transformuese të letërsisë. SYRI.net
