Të dashur besimtarë myslimanë,

jemi në prag të muajit të shenjtë të Ramazanit, muaji i sakrificës dhe meditimit, muaji i devotshmërisë dhe përkushtimit, muaji i përpjekjeve për ta dëgjuar zërin e shpirtit dhe për ta marrë mëshirën dhe dashurinë e Zotit, muaji që kërkon qëndrim stoik dhe vullnet të fortë, zemër të qetë dhe mendime të kthjellëta.

Bukurinë dhe vlerën e vetëpërmbajtjes e kuptojnë vetëm agjëruesit andaj ta shfrytëzojmë këtë muaj të begatë për solidaritet dhe punë të mira.

Islami përveçse një religjion i përqafuar nga komuniteti mysliman është edhe një dhuratë për mbarë njerëzimin duke na treguar rrugën e Zotit, të vërtetës, të dritës dhe dijes, madje në poezinë e Hafiz Ali Korçës “Ankim edhe Këshillim” autori mes vargjeve thotë: “Sa të shtohet diturija, aqë njihet Perëndija”.

Sipas tij njohja e Perëndisë arrihet vetëm përmes diturisë dhe mos të hamendësoj dikush se vetëm me rite pro forma do të arrijë mëshirën e Zotit sepse ashtu siç Gandi edhe unë besoj që: “Përpara fronit të të Gjithëfuqishmit, njeriu do të gjykohet jo nga veprimet e tij, por nga qëllimet e tij. Sepse vetëm Zoti i lexon zemrat tona”

Andaj uroj që muaj i sakrificës të pastroj zemrat, veprimet dhe qëllimet tona, sepse sa më i vetëdijshëm aq më afër Zotit.

Agjërim të lehtë dhe të pranuar!

Zoti ju bekoftë!

Prof. Dr. Vullnet Ameti