Më 6 dhjetor të vitit 1689, u nda nga jeta, në Prishtinë, personaliteti i shquar i Kishës dhe kulturës, ipeshkvi i jashtëzakonshëm imzot Pjetër Bogdani. Prift, ipeshkëv, kryeipeshkëv, teolog e filozof nga Hasi, atdhetar, dijetar e letrar që dha kontribut të vlefshëm në teologji e në përpjekje për çlirimin e vendit nga zgjedha osmane, për zhvillimin dhe përparimin e kulturës së shqiptarëve.
Imzot Pjetër Bogdani lindi në vitin 1627 në Has. Mësimet e para i bëri në Ciprovac, Bullagri. Në vitin 1674 ishte nxënës i kolegjit ilirik të Loretos. Pas studimeve filozofike e atyre teologjike shugurohet prift. Më 1651 ushtron detyrën e meshtarit në Pult e në fshatrat e Prizrenit, në anët e vendlindjes. Në vitin 1656 thirret në Romë për të vazhduar studimet e larta teologjike në Kolegjin papnor të Propagandës së fesë. Aty i mëson gjuhët e Lindjes. Më 1658 kreu studimet e larta të teologjisë e filozofisë në Romë dhe mori titullin doktor. Pas një kohe veprimtarie e apostullimi si meshtar, emërtohet ipeshkëv i Shkodrës dhe administrator i Tivarit. Në vitet 1663–1664 njihet dhe i bën shërbime Kardinal Barbarigo, i cili në atë kohë jetonte e punonte në Romë. Më 1675 e shkruan librin “Çeta e profetëve” dhe ia paraqet Kongregatës së Vatikanit Propaganda Fidae për botim. Rekomandimi i Propagandës ishte të përkthejë libri edhe në latinisht e italisht.
Me veprimtarinë e tij misionare, kishtare, shoqërore, kulturore dhe politike 40 vjeçare, sidomos me rolin që luajti si udhëheqës i kryengritjes çlirimtare të vitit 1689 dhe me kryeveprën e vet teologjike “Cuneus Prophetarum De Christo Salvatore Mundi, Et Eius Evangelica Veritate”, apo sipas përkthimit të françeskanit At’ Justin Rrotës “Çeta e profetëve”, imzot Pjetër Bogdani është quajtur pararendës i hershëm i lëvizjes së rilindjes shqiptare e teolog i shquar.
Krahas misionit shpirtëror, pra atij ungjillor, imzot Pjetër Bogdani, punoi edhe në kultivimin e identetitetit e të mbrojtjes së popullit. Merret aktivisht me organizimin e rezistencës antiturke dhe u bën vizita të gjitha bashkësive kishtare në territorin e Kryedioqezës së vet e edhe më gjerë. Në vitin 1689 depërton ushtria austriake. Në nëntor kjo ushtri arrin në Prishtinë. Imzot Pjetër Bogdani niset me ushtrinë për Prizren, ku i inkuadron edhe 6.000 shqiptarë dhe bashkë me ta arrin atje.
Në Prizren imzot Pjetër Bogdani sëmuret nga murtaja. Ndërroi jetë më 6 dhjetor 1689, në Prishtinë, ku edhe varroset. diasporashqiptare
