Hapja e shkollës shqipe të Korçës ishte një ngjarje e shënuar dhe një fitore për gjithë Lëvizjen Kombëtare Shqiptare. Ajo ishte kurorëzim i përpjekjeve të përbashkëta të organizatave atdhetare të mërgimtarëve shqiptarë dhe të atdhetarëve brenda vendit. Mësonjëtorja shqipe e Korçës nuk varej dhe nuk financohej prej asnjë shteti apo shoqërie të huaj. Ajo u hap, u financua dhe u mbrojt nga populli dhe shoqëritë shqiptare të mërgimit.

Mësonjëtorja e Korçës u bë qendër e përhapjes së shkrimit dhe këndimit të gjuhës shqipe, qendër e përhapjes së ideve kombëtare shqiptare. Duke qenë shkollë e përbashkët për fëmijët e besimeve të ndryshme, ajo ndihmonte në bashkimin e shqiptarëve pavarësisht nga feja dhe ngrinte tek ata ndërgjegjen kombëtare.

Kjo ngjarje u konsiderua si një fitore për popullin shqiptar, pasi deri  atëherë mësimet organizoheshin në shtëpi private  në kushte të vështira dhe represive . Megjithëse në kushte të vështira, ajo qëndroi e hapur për 15 vjetët e ardhshme. Drejtues të saj ishin figura të shquara të Rilindjes sonë kombëtare, si: Pandeli Sotiri, Petro Nini Luarasi, Nuçi Naçi, Thoma Avrami dhe të tjerë. Që nga kjo datë e rëndësishme historike, kjo ditë shënohet si festë kombëtare. 7 Marsi, Dita e Mësuesit, në përkujtim të kësaj ngjarje, festohet po kështu edhe në shenjë respekti dhe mirënjohje për arsimtarët e sotëm, të cilët, ende janë të përkushtuar për këtë mision të shenjtë e fisnik, punojnë me zell e dashuri për arsimin shqip, dhe edukimin e brezave të rinj.

Institucionet arsimore shqiptare me në krye Universitetin e Tetovës i themeluar (1994) nga Rektori, Prof. Dr. Fadil Sulejmani, mburren me punën e deritashme në dobi të arsimit në gjuhën amtare dhe për ngritjen e kuadrove të reja për nevojat e shkollave shqipe, jo vetëm në vendin tonë por edhe më gjerë.

Mësuesve tanë të nderuar dhe të gjithë punonjësve të arsimit ua urojmë festën e 7 Marsit, me dëshirat më të mira për suksese të reja dhe arritje në sferën e arsimit në gjuhën amtare.

Tradita.org