Në emër të Universitetit  të Tetovës, kam nderin e veçantë që  t’Jua uroj 7 Marsin, këtë ditë të shënuar  të arsimit në gjuhën shqipe. Këtë datë historike e kujtojmë me respekt të thellë për mësuesit e parë shqiptarë që na e lanë amanet gjuhën tonë të bukur, gjuhën shqipe.

Dita e Mësuesit shënohet si një ngjarje me rëndësi kulturore e historike. Sot, të gjithë shqiptarët,  në të  gjitha trojet , pa dallim të ndarjeve administrative, si dhe në mbarë diasporën, me nderimet më të larta i kujtojnë mësuesit tanë që na i mësuan shkronjat e para.  Sikurse e dimë të gjithë, me 7 mars të vitit 1887, në Jug të Shqipërisë, qytetin e bukur të Korçës, u hap Mësonjëtorja e parë shqipe, me mësues dhe drejtor të parë të saj Pandeli Sotirin.

Në këtë përvjetor  për shkollën dhe arsimin tonë kombëtar, ndjej obligim t’u shprehim mirënjohjen tonë më të thellë edhe plejadës së profesorëve të parë të Universitetit tonë, të cilët sakrifikuan të gjitha forcat e tyre mendore dhe fizike për ta ngritur këtë tempull të diturisë në nivelin e një Universiteti modern, të cilin e gëzojmë sot . Mësuesve tanë të nderuar dhe të gjithë punonjësve të arsimit ua uroj festën e 7 Marsit, me dëshirat më të mira për suksese të reja në misionin e tyre të shenjtë, arsimimin dhe edukimin e gjeneratave të reja.

Prof. Dr. Vullnet Ameti

Rektor i Universitetit të Tetovës