Orkestra Simfonike e RTSH-së u themelua më 16 maj të vitit 1962 si formacioni orkestral më i madh i kohës. Fillimisht u quajt “Orkestra Simfonike e Radios dhe Kinematografise”. Krijimi i saj shënoi një etapë të re në zhvillimin kulturor dhe artistik në Shqipëri.
Koncerti i parë u realizua më 20 gusht të po atij viti nën dirigjimin e Mustafa Krantjes dhe u luajtën vepra të Haydn, Mendelssohn dhe Mozart.
Janë ekzekutuar dhe regjistruar si emisione radiofonike për atë kohë veprat e para të kompozitorëve dhe njëkohësisht të drejtuesve muzikorë të institucionit si simfonitë e para të Abdulla Grimcit, Vath Çangut e më pas veprat e kompozitorëve të tjerë të cilët u bënë dhe udherrëfyesit e zhvillimit muzikor në vend Çesk Zadeja, Tonin Harapi, Tish Daija, Kozma Lara, Pjeter Gaci, Feim Ibrahimi etj e deri te brezat më të rinj Limoz Dizdari, Shpëtim Kushta, Kujtim Laro, Thoma Gaqi, Aleksandër Peçi, Hajg Zaharian, Spartak Tili, Gazmend Mullahi, Sokol Shupo e deri tek akoma më të rinjtë Vaso Tole, Ermir Dergjini, Endri Sina etj…
Nga vitit 1964 e deri në vitet 2000, dirigjenti emblem i kësaj orkestre ishte i madhi Ferdinand Deda, i cili nuk ishte vetëm dirigjent por edhe kompozitor, orkestrues, instrumentist, një artist me energji dhe kontribut të jashtëzakonshëm në Orkestrën Simfonike. Një rol të rëndësishëm në aktivitetin artistik dhe zhvillimor të kësaj orkestre nga vitet 1978 e deri në vitet 1990, ka luajtur edhe dirigjenti i mirënjohur Eno Koço si drejtues i shumë koncerteve simfonike, vokale, regjistrime të muzikës së filmave, koncerteve jashtë vendit etj.
Orkestra Simfonike RTSH është nderuar me çmimet “Naim Frashëri Artë” në vitin 2007, “Çmimin e karrierës” në vitin 2009, si dhe “Nder i Kombit” në vitin 2017.
