5 Maji, Dita e Dëshmorëve të Kombit, shënohet si në Shqipëri, Kosovë, Maqedoninë e Veriut, Luginë të Preshevës, Mal të Zi, Çamëri dhe gjithandej në Diasporën e madhe shqiptare, kudo që shqiptarët frymojnë në rrethana të reja me emrin liri dhe shtet, e gjithë kjo krenari kombëtare që ndjehet është në lavdinë e dëshmorëve të kombit.

Çdo faqe historie dhe pëllëmbë toke, dëshmorët e kombit e kanë kthyer në histori dhe tokë martire, sepse kjo tokë është ujitur me gjak lirie dhe është shndërruar në tokë lirie dhe paqe.

Të gjitha skajet e trojeve etnike shqiptare, kanë epopetë e veta, i kanë dëshmorët e të gjitha luftërave për liri dhe dinjitet kombëtar, e kanë ngadhënjimin dhe çmimin e lirisë.

Shteti shqiptar dhe ne shqiptarët kudo që jemi, si një komb e festojmë ditën e dëshmorëve, për ta ndarë një ditë të veçantë, ku bëjmë homazhe para varreve të tyre, ku janë reliktet e një dëshmie për lirinë e sotme dhe për një të ardhme më të ndritur.

Dita e dëshmorëve, shënon një nga datat e ndritshme të kujtesës sonë. Shënon datat më të rëndësishme të së kaluarës sonë të lavdishme, të kthesave të mëdha të kombit tonë.

Dëshmorët janë emra njerëzish që dolën nga gjiri i këtij populli, janë krenaria e këtij populli që e sollën lirinë në mesin tonë.

Lavdi të gjithë atyre që ranë për lirinë e kombit!