Magazina rajonale informative “Via Balcanica” sjell për shikuesin ballafaqimin e skenës kulturore në pandemi në tri vende të Ballkanit. Kjo përmes këndvështrimit të tri ngjarjeve më të rëndësishme kulturore në Kosovë, Mal të Zi dhe Bosnjë-Hercegovinë.
Në episodin e pestë shikuesi njihet me ballafaqimin e ekipit të festivalit të filmit dokumentar në Prizren “DokuFest”, i cili për herë të parë në 18 vjet u detyra të mos i ndezë ekranet e mëdha të Prizrenit. Si e kanë përjetuar organizatorët gjithë këtë ndryshim dhe si ka qenë për ta kalimi në komunikim online me publikun dhe adhuruesit e filmit, janë çështjet që trajtohen. Përveç kësaj, në këtë material paraqitet edhe një retrospektivë e asaj që “DokuFesti” ka arritur ndër vite duke u shndërruar në dritare të Kosovës me botën dhe anasjelltas.
Në Mal të Zi fokusi është vënë tek festivali i filmit dokumentar dhe të shkurtër “Underhill”, ekipi i të cilit vendosi të realizonte një edicion të ri edhe përkundër rrethanave jo të përshtatshme. Nga 16 deri më 23 qershor 2020, me artin e shtatë, Podgorica u ringjall në kohën kur gjithçka kishte ndaluar. Organizatorët e kanë cilësuar sfidues edicionin e fundit, i cili me gjithë masat u organizua pothuajse në kushte normale. Në të kundërtën ekipi ishte i gatshëm edhe për opsionin e një “drive-in” festivali.
Nga Bosnja-Hercegovina do kuptojmë se si është përballuar me pandeminë festivali më i rëndësishëm filmik i kësaj hapësire, “Sarajevo Film Festival”, që u organizua prej 14 deri më 21 gusht. Edicioni më i pazakonshëm i SFF-së deri më tash u mbajt në formatin online për shkak të pandemisë së koronavirusit. Vetëm rreth dhjetë ditë para hapjes u hoq dorë nga projeksionet e planifikuara dhe nga zbavitjet e takimet e zakonshme me të famshmit nga bota e filmit. Që të mos ndodhë shuarja e plotë e magjisë së Festivalit që Sarajevën e mbërthen çdo gusht, organizatorët në mënyrë simbolike e kanë vendosur tepihun e kuq para Teatrit Popullor. Koha.net
