Dhe për këtë regjimi i kohës qe treguar fare i akullt duke ia refuzuar disa herë vizën për hyrje në tokën shqiptare.

Pas disa radhëve në letrën e shkruar në anglisht, misionarja e bamirëse nga Kalkuta i adresohet Alisë në shqip.

“Ja kam dhan besën e Shqiptarit Zotit me prue dashni dhe paqë mbi gjithë botën”, shkruante 79-vjeçarja, nami i së cilës kishte marrë dhénë.

Ky është vetëm një nga tri dorëshkrimet origjinale të Nënë Terezës që ruhen në arkivat e shtetit shqiptar.

Bashkë me materiale të tjera arkivore, këto letra do të bëjnë pjesë në shkëmbimet e ndërsjella mes Drejtorisë së Përgjithshme të Arkivave të Shqipërisë dhe Institutit të Trashëgimisë Shpirtërore e Kulturore të Shqiptarëve – Shkup, në Maqedoninë e Veriut.

Në njoftimin e afishuar të mërkurën në faqen e Drejtorisë së Përgjithshme të Arkivave është njoftuar për bashkëpunimin me ITSHKSH-në në fushat e përbashkëta të ruajtjes së trashëgimisë kulturore.

“Me rastin e përkujtimeve të 110-vjetorit të lindjes dhe 4-vjetorit të shenjtërimit të Nënë Terezës, Departamenti për Hulumtimin e Trashëgimisë së Gonxhe Bojaxhiut pranë ITSHKSH-së në Maqedoninë e Veriut dhe Arkivit Qendror Shtetëror do të bëjnë shkëmbimin e ndërsjellë të kopjeve të dokumentacionit arkivor që ruhet aktualisht në këto dy arkiva respektive të materialeve që bëjnë pjesë në fondin e Gonxhe Bojaxhiut (Nënë Terezës). Kjo procedurë do të realizohet në formate të ndryshme të kopjeve”, thuhet në njoftimin e DPA-së. “Ky shkëmbim dokumentacioni do të bëhet për të pasuruar fondet e arkivave dhe për t’u mundësuar qytetarëve të të dy vendeve të kenë akses të plotë në fondin e njësuar të Nënë Terezës”.