Festivali Internacional i Teatrove – Aktori i Evropës 2020 për të 18-tën herë do të mbahet prej 25 deri më 30 gusht në Resnjë. Për shkak të situatës me Covid-19, organizuesit informojnë se të gjitha ngjarjet e festivalit do të mbahen në ambient të hapur, me të gjitha masat e sigurisë, në pajtim me protokollet e Qeverisë.

Festivali në mënyrë solemne do të hapet para “Sarajit” në Resnjë më 25 gusht me vargjet e klasikëve të poezisë shqipe, maqedonase dhe greke, e më pas do të pasojnë fjalime përshëndetëse të kryetarit të festivalit, Branisllav Miçunoviq-Zhaga, kryetarit të jurisë internacionale Meto Jovanovski dhe Rektorit të Universitetit internacional Europa Prima dhe Kryetarit të Festivalit, Jordan ÇPlevnesh.

Çmimi kryesor Aktori i Evropës 2020 këtë vit do t’i ndahet aktores Arta Dobroshi nga Kosova.

Me këtë mirënjohje, Arta Dobroshi do të radhitet në mesin e emrave të fituesve të deritnaishëm, siç janë Ljuba Tadiq (Serbi), Jon Karamitru (Rumani), Milena Zupançiç (Slloveni), Ana Patreson (Suedi), Marsel Bozone (Francë), Rade Sherbexhija (Kroaci), Brus Mejers (Britani e Madhe), Selma Alispajiq (BeH), Maria Do Seu Gera (Portugali) dhe të tjerë.

Çmimin prestigjioz Çelësat e Prespës 2020, këtë vit do ta marrin Ambasadori i Republikës së Francës, E.T. Kristian Timonie dhe kardiokirurgu i njohur nga Los Angjelosi, SHBA, me prejardhje nga Maqedonia e Veriut, Dr. Stiven Bibevski.

Në kuadër të ceremonisë së njejtë, siç informojnë organizuesit, do të ndahet edhe Karta e madhe “Ballkani – Zemra e Evropës”, që këtë vit do ta marrin afaristë të shquar nga vendi, Irena Jakimovska, pronare dhe menaxhere e “Comfy Angel”, Sllobodan Kutrevski nga Pekabesko, Nebi Hoxha – kryetar i Odës ekonomike të Maqedonisë Veriperëndimore, si dhe Aris Vllahos, Kryetar iu Shoqatës së bizneseve greke në Maqedoninë e Veriut.

Festivali mbahet nga vera e vitit 2003 kur Parlamenti evropian e shpalli Liqenin e Prespës Park ndërkufitar evropian, mes Maqedonisë, Greqisë dhe Shqipërisë.