Adelina Xhaferi, studentja e Gjuhës dhe Letërsisë Shqipe dhe poetja e re e vendit tonë, më 27 qershor 2020, në ditën e dytë të manifestimit “Takimet poetike në Sharr” mori nga shtypi përmbledhjen e saj të parë me poezi – haiku “Botë përtej dritares”. Një libër që asaj edhe në këtë kohë pandemie e mjaft të vështirë për të gjithë i dha motiv për të rrugëtuar më tutje drejt botës së letërsisë, brenda së cilës gjenden fjalët më të bukura, të cilat kjo poete e re i solli mjaft bukur në këtë libër me haiku. Falë udhëheqjes së profesorit të saj Ejup Ajdini, i cili po ashtu merret me krijimin e këtyre poezive, ajo arriti që të ecë në rrugën e nisur nga ai dhe nga Universiteti i Tetovës, nga kjo vatër dijeje, duke qenë në prag të diplomimit, të dalë edhe me libër në duar, përpos njohurive dhe sukseseve të tjera.

Përmbledhja e këtillë përmban në vetvete 400 haiku (krijime të shkurtra japoneze me rregulla të veçanta krijimi, që ajo i bëri pjesë të letërsisë shqipe) të krijuara nga poetja në fjalë për një periudhë kohore tre vjeçare. Libri u recensua nga profesorët Ejup Ajdini dhe Arlind Farizi, të cilët nuk nguruan që këtë përmbledhje ta pasuronin me mendimet e tyre mbi krijimet e kësaj poeteje të re dhe ta mbështesnin atë në hapat drejt botës së letrave shqipe.