Pandemia globale COVID – 19, beteja shëndetësore e kohës, sfidon e kërcënon çdo kategori të shoqërisë sonë. Sot, mora lajmin e hidhur se ka ndërruar jetë urologu i njohur i Spitalit të Tetovës, Dr. Arifikmet Deari, njeharazi i angazhuar edhe në Fakultetin e Shkencave të Mjekësisë në Universitetin e Tetovës.

Dr. Arifikmeti, bashkë me qindra e mijëra punonjës të tjerë shëndetësorë, gjatë gjithë karrierës së tij ishte në shërbim të pacientëve e sidomos në këtë periudhë  të përballjes me pandeminë COVID – 19.

Ndarja e tij nga jeta, nuk është thjesht një humbje njerëzore, por një hero më pak në luftën e pakompromis ndaj virusit korona.

Ne drejtuesit e Universitetit të Tetovës, ju shprehim ngushëllimet tona familjarëve, komunitetit të mjekëve, pacientëve, studentëve, miqve dhe kolegëve të tij.

Mirënjohje për kontributin e dhënë në Fakultetin e Shkencave të Mjekësisë në Universitetin e Tetovës.

U prehtë në paqe!

Prof. Dr. Vullnet Ameti

Rektor i Universitetit të Tetovës