Abdulla Mehmeti | Brezi i ri, që të jetë i shëndoshë dhe i dobishëm për shoqërinë e kombin, nuk mjafton vetëm të edukohet dhe arsimohet, por duhet edhe të kalitet; sikur mielli që nuk mjafton të gatuhet, por duhet edhe të piqet, që t’i shërbejë njeriut.

“Rini, thueja kangës ma të bukur që di!
Thueja kangës sate që të vlon në gji.
Nxirre gëzimin tand’ të shpërthejë me vrull…
Mos e freno kangën! Le të marri udhë.”
(Migjeni)

Rinia e pakalitur në beteja të jetës mbetet si brumi i papjekur, që forcat destruktive në shoqëri mund ta manipulojnë lehtë dhe ta keqpërdorin si gjellë për derrat.

Rinia mund të kalitet duke ndërtuar e sendërtuar idealet e brezit që i takon, përmes dijes dhe përvojës së fituar, pa u ndikuar nga autoritetet e jashtme, pushteti, politika dhe kleri fetar.

Rinia është e lirë vetëm kur ndërton raporte të pavarura dhe të dobishme me rrethin, familjen, shoqërinë, shtetin, institucionet politike dhe fetare, sipas bindjeve të veta mbi jetën, shoqërinë, natyrën dhe besimet fetare, në bazë të dijes dhe përvojës së fituar, mbi parime morale, jo sipas diktatit, represionit dhe frikës nga ndëshkimi.

Brezi që rritet nën diktat, pa ideale të veta dhe pa liri të mjaftueshme, përfundon në depresion, kaos dhe anarki.

Secili brez i ri duhet t’i këput vargonjtë e diktatit dhe varshmërisë mendore e fizike nga të tjerët, që të hap shtigje të reja për ardhmërinë e tij.

Paramendoni se ku do të kishte përfunduar shoqëria jonë, nëse brezat e ri të mëparshëm nuk do t’i kishin sendërtuar idealet e veta kundër fanatizmit, robërisë së huaj dhe kundër frikës mbi çdo forcë dekadente e reaksionare.

Rini, për fatin dhe të ardhmen tënde të lirë e të lumtur, rrënoni idhuj dhe autoritete të rrejshme!

Zoti e do rininë e zgjuar, jo të përgjumur e të fjetur!