Nëse është dikush që ia ka parë hairin karantinës së imponuar nga pandemia e virusit COVID-19, është edhe Vesa Guraziu. Izolimi brenda shtëpisë e ka kthyer prizrenasen e re te një pasion i moçëm i saj. Dizajnon e rimodelon rroba, duke e kombinuar modernen me tradicionalen.
Në fakt, Guraziu tregon se qepjen e rrobave e ka pasion të fëmijërisë. Kishte nisur të qepte rrobat e kukullave të saj, derisa këtë pasion e dhunti ia kishte vërejtur halla, e cila do t’ia bënte dhuratë një makinë të qepjes.
Vazhdimisht ajo do t’i rimodelonte rrobat e saj, derisa komentet pozitive të shoqërisë bashkë me kohën me bollëk në dispozicion gjatë karantinës, do ta bënin ekonomisten e diplomuar në nivelin master që të mendojë të prodhojë rroba edhe për të tjerët. Një faqe në Instagram do të ishte pikënisja.
Produktet e saj momentalisht kufizohen në këmishë, fanella e fustane. Por ato janë unike.
Pasioni në veshje kukullash
Në bisedën për “Kohën Ditore”, Vesa Guraziu kthehet herët në fëmijërinë e saj, për të zbuluar pasionin që lidhet me modën. Thotë me siguri të plotë se dëshira për të dizajnuar rroba ka ekzistuar gjithmonë te ajo.
“Por ideja për t’i qëndisur ato filloi pasi që u frymëzova nga disa ilustrime të cilat më kanë interesuar së fundmi”, thotë Guraziu.
Megjithatë, këtë zanat ajo nuk e ka të trashëguar.
“Nuk është e trashëguar as qepja e as qëndisja. Të gjithë procedurën e kam mësuar vetë”, thotë ajo.
E Guraziu tregon se si e zbuloi këtë dhunti e pasion.
“Gjithçka nisi që kur isha e vogël, duke qepur me dorë fustane për lodrat e mia. Por pastaj halla ime e vërejti dëshirën që e kisha për t’i punuar ato fustane dhe më bëri dhuratë një makinë të qepjes. Kështu vazhdova të krijoja veshje për veten dhe të bëja rimodelime të veshjeve që i kisha”, thotë më tutje ajo.
