Mediat të sillen në mënyrë profesionale dhe etike dhe të mos kontribuojnë në përhapjen e të pavërtetave dhe krijimin e panikut në opinion, bëri thirrje sot Këshilli për Etikë në Media i Maqedonisë (KEMM) pas paraqitjes së rastit të koronavirusit në vend.

“Informimi në raste të tilla, sipas Kodeksit të Gazetarëve (neni 8), duhet të lirohet nga sensacionalizmat. Mediat duhet të veprojnë në atë mënyrë që i dallon nga raportues të thjeshtë të informacioneve dhe fakteve dhe ta zbatojnë edhe rolin e tyre si qetësues të shqetësimit te qytetarët”, theksojnë nga KEMM.

Përveç kësaj, thonë nga Këshilli, ata duhet me kujdes t’i qasen informacioneve me të cilat raportohen vlerësime për eskalimin e mundshëm të rasteve.