Përkujtim | Para një viti ndërroi jetë akademik Idriz Ajeti

Më 13 shkurt të vitit të kaluar, në moshën 102-vjeçare, ndërroi jetë albanologu, gjuhëtari e intelektuali, pedagogu dhe veprimtari i palodhshëm në zhvillimet tona shoqërore, akademik Idriz Ajeti.

Akademik Idriz Ajeti përfaqëson brezin e intelektualëve, të cilëve u ra barra t’i hedhin hapat e parë në ngjarjet me peshë historike për kombin shqiptar.
Me nivelin e tij intelektual, përmes studimeve shkencore albanologjike, Akademik Idriz Ajeti ka dhënë kontribut të jashtëzakonshëm në afirmimin e vlerave kulturore dhe historike për kombin tonë.
Si intelektual i dalluar punoi pa u ndalur, u shqua për parimet dhe qëndrimet e drejta atdhetare e intelektuale, të cilave nuk iu shmang kurrë, por iu përmbajt besnikërisht gjatë tërë jetës. Kultivoi figurën e pastër e të ndërgjegjshme të intelektualit shqiptar, që mund të shërbejë si model për brezat e ardhshëm.
Akademik Idriz Ajeti u shndërrua në vlerë dhe pasuri të çmuar shpirtërore në tërë hapësirën kombëtare. Ai e kreu me nder detyrën ndaj kombit dhe atdheut, prandaj i jemi mirënjohës përjetësisht dhe do ta përkujtojmë gjithmonë me admirim e respekt.
Vepra e tij do të jetojë përjetësisht dhe do të na shërbejë si frymëzim në rrugëtimin tonë të ardhshëm, neve dhe gjeneratave që vijnë pas nesh.
I përjetshëm qoftë kujtimi për akademikun, veprimtarin, shkencëtarin dhe dijetarin e shquar, Akademik Idriz Ajeti!