Shtresë e dëborës prej mbi 17 centimetër janë regjistruar në Mavrovë dhe Krushevë nëpër qytetet ka reshje të përzier të shiut dhe borës. Nga DPHM thonë që moti me lagështi do të përfundoj këtë fundjavë. Prej nesër, presin mot të thatë dhe stabil, por pa erë që si pasojë do të ketë ndotje të ajrit.

 “Gjatë ditës do të kemi më shumë diell, por më ngrohtë do të jetë në vendet më të larta, ndërsa në lugina për shkak të mjegullës që do ta kemi në orët e paradites, moti do të jetë më i ftohtë. Kështu që temperaturat ditore në periudhën në vijim do të jenë në intervalin 4 deri në 12 gradë. Do të kemi mot të qëndrueshëm deri në fund të javës tjetër, me rryma shumë të dobëta, të cilat nga ana tjetër do të kontribuojnë në rritjen e ndotjes së ajrit në vendin tonë “-tha Lençe Rizova, sinoptike kujdestare në DPHM. Deri në fund të dimrit moti është vështirë për tu parashikuar, por të paktën në dhjetë ditët e ardhshme nga Drejtoria nuk presin ndonjë reshje të re.

 “Këto ditë deri më datën 20 do të jemi nën një masë ajrore të qëndrueshme. Pastaj ka disa reshje, por sipas materialeve aktuale do të jetë diçka e ngjashme si situata aktuale – në vendet e ulëta do të bjerë shi, ndërsa në vendet më të larta dhe malet natyrisht dëborë”-pohoi Lençe Rizova, sinoptike kujdestare në DPHM.

Nga “Rrugët e Maqedonisë” informojnë se ka reshje më intensive në zonat malore në perëndim, por nuk ka kufizime. Ata na e rikujtojnë obligimin për të pasur pajisje dimërore në automjete.  /ALSAT